Laugardaginn 20. ágúst var þessi ferð á dagskrá, sameiginleg ferð Ferðafélags fjarðamanna og Ferðafélags Fljótsdalshéraðs. Farið var með rútu í Þorvaldsstaði. Þar tók Pétur bóndi á móti hópnum og eftir spjall og leiðsögn var haldið inn Hróarsdal en farið uppúr honum miðjum um Móskjónuskarð. Handan þess eru inndalir Fáskrúðsfjarðar. Þar var gengið um Gagnheiði undir Gagnheiðarhnjúk og Miðheiðarhnjúk og gegnum Gagnheiðarskarð en þá er stutt á leiðina um Stuðlaheiði í Stuðla í Reyðarfirði. 11 manns voru í ferðinni. Sæmilega bjart var til næstu fjalla úr Breiðdal en þegar komið var hærra var þoka og glæsilegustu fjöllin á leiðinni sýndu sig lítið. Þó reif hann af sér þegar komið var áleiðis niður Stuðlaheiði og lá nærri að sól sæist.

Ljósm. Kristinn Þorsteinsson