Að þessu sinni voru sumarpáskar og sólin því komin upp fyrir nokkru þegar prósessían sem í þetta sinn taldi 23 árrisula náttúruunnendur, lagði af stað frá Norðfjarðarvita. Suðvestan strekkingur, sjö gráðu hiti og glaðleg ský á siglingu hið efra, en lágsigld sólin sendi skæra geisla beint framan í göngufólkið. Rifjaðar upp þjóðsögur tengdar Páskahelli. Í holu eftir kolað tré voru tveir fallegir páskaungar sem ein af dúfunum sem eiga aðsetur í klettunum ofan við hellinn hafði ungað út. Víða voru blómstrandi vorblóm og vorlegt í Klofasteinum utan og ofan við Hellinn. Að venju var mættur harður kjarni sem tekur gönguna sem hluta af páskahátíðinni og svo ný andlit bæði hér heima og eins lengra að komin og páskagestir sem koma á gamla heimaslóð. Alltaf jafn ánægjulegt að fara þessa ferð fyrir fararstjóra, en ferðin var upphaflega til árið 2000 þegar Ferðafélag Fjarðamanna ákvað að taka þátt í Páskafjöri í Fjarðabyggð. Þetta var því tólfta ferðin í Páskahelli á páskadagsmorgun og má segja að enginn morgunn hafi verið öðrum líkur.

Ína D Gísladóttir