Vorferðin á Suðurbæi 2009 var farin í fyrra lagi eða helgina 23.-24. maí. Óvenju mikill snjór var á Barðsnesi í vetur og er til dæmis enn talsverður snjór í Sandvíkurskarði. Sjórinn var eins og heiðartjörn bæði þegar matföngum og svefnpokum var róið í land á Barðsnesi, við sett í land við Viðfjarðarbryggu um miðjan laugardag og sótt í Hákarlavog á sunnudagskvöld. Af og til rigndi talsvert og dimmdi yfir á köflum og var lítið útsýni að hafa á fjöllum, en hluti hópsins freistaði þess að birti og fór hálfa leið í Sandvíkurskarð. Á sunnudagsmorgni var dagurinn tekinn snemma og við náðum ágætu veðri í fjörunum austan Horns, sumir fóru svo út á Font, sumir niður undir Rauðubjörgin og enn aðrir gengu beint til bæjar og fengu sér kríu fyrir kaffið. Það er algengt að Íslendingar kvíði því að veður verði ekki nógu gott. Það er viss feginleiki fólgin í því að átta sig á að allskonar veður er skemmtilegt og hressandi upplifun að fá yfir sig dembu. Eftir eina slíka er indælt að eiga að jafn vistlegu húsi og á Barðsnesi að hverfa. Þó að veðrið hefði getað verið betra lék göngufólkið við hvern sinn fingur bæði á göngu og eins áttum við ágæta vist í húsi við góð matföng, lestur, spil, spjall og spádóma. Með fylgja nokkrar svipmyndir úr ferðinni. Hópurinn taldi 15 manns með fararstjórum.
Ína D. Gísladóttir
