Tíu manns fóru í kvöldgöngu frá bílastæðinu sunnan brúar ofarlega í Oddsdal á sunnudagskvöldi í gönguviku 2009. Veður var yndislegt, glampandi sólskin, náttúran skartaði sínu fegursta. Þó að þetta svæði láti lítið yfir frá vegi séð er farið um fagran fjallasal með skrautlegum tindum og með góðu útsýni inn í þrjá dali Norðfjarðar, Oddsdal, Seldal og Fannardal. Einnig er fagurt að líta til Hellisfjarðar og alla leið út á Barðsneshorn. Neðan við Vatnshjallann í Hellisfirði var hreindýrahópur og á niðurleið gengum við um hvalbök sem sýndu stefnu skriðsjökulsins sem dalinn skóp. Með okkur í þessarri ferð voru langt að komnir ferðalangar Höskuldur Jónsson fyrrverandi forseti Ferðafélags Íslands og fjölskylda hans. Ánægjuleg ferð og er ástæða til þess að benda fólki sem telur sig ekki fært um erfiðar fjallgöngur á þessa leið sem er aflíðandi og mjög þægileg en tekur 3-4 klukkustundir í rólegheitagöngu.
Ína D Gísladóttir
