Fjölmenni, eða 38 manns, fór í árlega hátíðargöngu í Páskahelli í ár. Fyrir austurhimininn var ofin þykk blágrá kemba sem ekki hleypti svo mikið sem sólargeisla í gegn en veður var einstaklega blítt og kyrrt og hiti rétt um frostmark. Ef til vill var það einmitt núna á góupáskum sem sólin dansaði og þá á bak við skýin, hver veit. Og ekki yrði ég hissa þó að í hóp íbúanna hefði bæst svo sem ein selastúlka eða piltur sem hafði glatað hami sínum við landskemmtan á páskum þegar selirnir gengu á land í Páskahelli til gleðileika. Göngufólk naut samverunnar og sérstaklega þótti börnunum sem voru mörg, gott að eiga þessa stund með foreldrum sínum. Hér koma nokkrar myndir frá morgninum en erfitt var að festa á filmu hópinn sem lagði af stað í morgunskímunni, einungis glitti í endurskinsmerkin.
Ferðafélag Fjarðamanna og fararstjórinn Ína Gísladóttir þakka þátttakendum samfylgdina.
Ljósm. Ína Gísladóttir og Heiðbrá Guðmundsdóttir.
