Núna eru afrek í tísku hjá útivistarfólki. Að ganga, hlaupa eða hjóla landið þvert og endilangt, eða hringinn, eða fara um fjallgarða. Í fyrra fór Kiddi að leita að einhverju verðugu verkefni hér á okkar slóðum, svona til að austfirskir göngumenn yrðu gjaldgengir í samanburðinum. Þannig varð Fannardalshringurinn til. Leiðin frá Goðaborg og inná Fönn hefur verið gengin og var þekkt en hinn hluti leiðarinnar um tindana frá Fönn og útá Hólafjall hefur lítt verið farinn og hefur því Kiddi átt ófáar ferðir uppúr Eskifirði til að kanna þá leið og safna GPS slóðum. Það var svo ákveðið að ferðin yrði laugardaginn 6. ágúst klukkan 8.00 frá Fannardal. 6 manns mættu og fóru fyrirhugaða leið, fyrst uppá Goðaborg og síðan eftir eggjum og tindum inná Fönn og út að sunnan útá Hólafjall og niður í Seldal, sjá mynd hér fyrir neðan. Veðrið var hefðbundið nútíma austfirskt sumarveður, þoka á fjöllum og lítið skyggni, fyrr en vel var liðið á ferðina þá birti til.
Leiðin var um 33 km löng og heildarhækkun um 2700 m. Ferðin tók rétt rúma 14 tíma. Að minnsta kosti tveir þátttakenda hafa þegar uppi yfirlýsingar um að fara þetta aftur í björtu. - Árni R.

Gönguleiðin, blásvarti ferillinn

Ljósm. Kristinn Þorsteinsson